歡迎來到 Ken Sir 的投資心得，本網站將教大家一點關於牛熊證的投資知識。我打呢一篇文既目的，並唔係鼓勵大家炒牛熊證，我反而係叫大家盡量唔好炒牛熊證。
希望大家睇完呢一篇文章之後，會了解牛熊證佢本身既問題所在，即使真係要用牛熊證，都要知道自己咩位係比人抽緊水。
係金融市場中，牛市即係個市升緊，熊市即係個市跌緊。
買牛證即係買個市升，買熊證即係買個市跌。
牛熊證因為本金細，易學，買賣容易，輸既本金最盡都只係投入既金額，所以好受散戶歡迎。
特別係大學生或剛畢業出黎做野既一類，因為一張證低至只係幾百蚊就買到，而睇法只係估個市上定落，簡單到用網上銀行證券戶口就買到，而輸盡都係果幾百蚊，真係簡單易學！（表面上）
我仲記得我岩岩初入股海時正正就係上面呢類人，一開始就係比牛熊證玩，上落少少就好緊張，但入面咩數都唔識計，只知升同跌會影響我個價，輸左之後就諗點樣睇準Ｄ個市，而無諗過用緊既工具本身有冇問題。
簡單黎講，指數牛熊證可以話係期指既小型版（當中附加抽水），期指升跌就直接影響牛熊證既價值。
呢一篇文章中，我只會講指數牛熊證，股票牛熊證其實都差唔多，所以照睇都會明，而我最主要既目的都係想大家知道牛熊證既問題。
係講佢既問題之前，我首先講解牛熊證入面既常用名詞先。然後就會深入教大家計算入面既數，而呢ｄ位就係大家要留意既地方。
(本篇文章會以簡單到中學生都睇得明既角度去寫，部份內容可能會令資深者覺得好悶)
其中一隻牛熊證既例子，以下講解一下：
１）發行人：即係邊間發行商出，例如有中銀，法巴，瑞信，高盛，摩通．．．
２）牛熊證編號：呢個編號就好似股票NO.咁，當買賣或者查價時就輸入呢個NO.
３）牛證／熊證：牛證即係買個市升，性質類似期指做LONG(睇好)；熊證即係買個市跌，性質類似期指做SHORT(睇淡)
４）相關資產：買邊隻野升定跌，圖中既例子隻牛證係買恆指升。其他例子：匯豐銀行；長和；中石油．．．
５）收回價：當恆指升（跌）穿呢個位既時候，呢一隻證就會被強制回收，即係永久停止交易，呢個情況俗稱隻牛(熊)被殺，或者叫打靶。
（牛證即係個市跌穿呢個價就回收；熊證即係個市升穿呢個價就回收）。（注意收回價係睇恆指，唔係期指）
６）行使價－有兩個用途：
Ａ）當隻證到左收回價後，用黎計下佢仲有幾多剩餘價值可以退返比買既人（退返剩餘價值比人就俗稱執骨）；
例：假設今日10:00 恆指係19000點，呢個時候我買左上面呢隻18900點回收既牛證。假如11:17 時恆指跌到18900點的話，呢一隻牛證就會被強制回收，不能再交易。
（剩餘價值計法見下一部份解說）
Ｂ）當到左到期日時，用黎計買左既人可以拎返幾多錢。（到期結算的價值計法見下一部份）
７）換股比率：呢個數有好多種，例如10000:1；15000:1；20000:1。代表住呢隻牛熊證係相關資產的幾多分之一。(詳細見下一部份)
８）槓桿比率：單位係倍數。即係當相關資產升跌１％，隻牛熊證理論上就會以呢個倍數既％升跌。(詳細見下一部份)
８）溢價：簡單黎講就係佢偏離左理論價值幾多。(詳細見下一部份)
９）現價：最近一筆成交既價錢
１０）升／跌％：比起上一日既價錢百分比差距
１１）到期日：最多只可以持有呢一張證去到呢一日
１２）街貨量（百萬份）（％）：代表市場上有幾多份係賣左比散戶，有幾多％由散戶?緊，有幾多％仲係發行商到未賣。
以下針對上面部份名詞作詳細解說：
（以下例子全部用牛證說明，除非熊證部份計法不同先會另外再講）
剩餘價值計算方法：
例：用返上面個例子，19000點時買，上午恆指跌到18900點此證被強制回收。此時要再觀察埋下一個交易時段恆指最低既點數係幾多，呢個最低點就係結算價。
睇埋下一個交易時段既意思即係睇埋下午直到收市。
如果隻證係下午被回收，要睇埋下一個交易時段，即係下一個交易日既上午收市(12:00)為止，都係睇恆指最低既點數係幾多。
牛證收回時剩餘價值 =（結算價－行使價）／換股比率
結算價＝１８７３０ (由收回開始直至下一時段的最低點數，並不只是收回時段的最低)
行使價＝１８７００
換股比率＝１００００
剩餘價值 = (18730-18700)/10000) = $0.003
而每手牛熊證基本上都係10000股一手, 所以可以收返既錢= $0.003 *10000= $30
一隻肥牛比人殺左之後得返幾十蚊，呢個情況真係好似得返d骨比你執，所以俗稱執骨。
而跟據上面呢條算式，我地可以睇到當恆指有任何一秒跌到１８７００或者以下既話，係連骨都無得執既。
（如果數值計出後係負數都當作＄０）
有ｄ牛熊證佢既行使價係等於回收價，呢種證都係一被回收就冇任何錢可以拎返。
熊證既剩餘價值計法都係差唔多，只係少少唔同。
熊證收回時剩餘價值 =（行使價－結算價）／換股比率
（拆解牛熊證）
其實牛熊證既回收價呢一樣野你可以當做係止蝕。
會有Ｄ似買期指，當佢一到左你Set既止蝕價佢自動幫你Cut order。
但佢賤格既地方在於，止蝕理應一止就停可以立即計清楚，但佢卻要睇埋最低位係邊，用呢個最低位黎同你計你咩位止蝕。
仲要唔止睇而家個時段，要睇埋下一個時段既最低位，邊有止蝕係咁搵笨既呢？？牛熊證就係咁。
我自己買期指就可以話Cut就Cut，即時計清楚。
另外個問題就係一掂就Cut。
好似我個系統咁，我個系統既止蝕方法並唔係一掂到某個點數就即時止，而係以某個時段完結時，個價仍然係某價以下先Cut。
舉個例：我止蝕設定方法係今日收市前如果個市係低過18900我就Cut。
好似上面果張圖咁，今日個走勢係Ｖ型行法，收市時個價係１萬９千幾，如果一掂就Cut咁我就比佢Cut左。但用我個方法就唔使止蝕。
（Ｐ．Ｓ．此方法有另一Ｄ風險，個市可能一直向下，可能比起18900低好多好多先收市，一掂就Cut有可能減少損失）
我想講既係，牛熊證無得比你揀你係一掂就cut定係好似我個方法咁，而期指就可以比你自由選擇，你可以做既策略方式就多ｄ。
如果隻牛熊證好大命由出世去到到期日都未比人斬既話，可以拎返幾多錢既計法同剩餘價值條式係一樣
牛證＝（結算價－行使價）／換股比率
熊證＝（行使價－結算價）／換股比率
但係個結算價就唔會用果日既最低點，而係用「期指」（注意係期指唔係恆指）結算日既結算價去計
（牛熊證到期日果日一定係期指結算日）
（期指結算價計法可以睇返上一篇《期貨／期指教學（２）》
換股比率代表住呢隻牛熊證係相關資產的幾多分之一。
１）牛證：如果換股比率係1:1 既話，理論上期指升１點，隻牛證就升$1。 (1:1呢樣野現實係不存在)
熊證：如果換股比率係1:1 既話，理論上期指跌１點，隻熊證就升$1。
２）如果換股比率係10000:1 既話，理論上期指升10000點，隻牛證就升$1。
同樣換股比率係10000:1 既話，理論上期指升10點，隻牛證就升$0.001。(10點/10000比率=$0.001)
以每手10000股計，當期指升10點，隻牛升$0.001即係會賺到($0.001*10000股)= $10
所以如果換股比率係10000:1 既牛證，理論上期指每升10點就賺到港幣$10。而細期每點值$10，所以係細期既十分之一。
（牛熊證上落最細單位係$0.001，所以要夠１０點先郁到個價）
（留意指數牛熊證價格升跌係睇期指唔係恆指）
３）如果換股比率係15000:1 既話，理論上期指升15000點，隻牛證就升$1。
同樣換股比率係15000:1 既話，理論上期指升15點，隻牛證就升$0.001。(15點/15000比率=$0.001)
以每手10000股計，當期指升15點，隻牛升$0.001即係會賺到($0.001*10000股)= $10
４）如果換股比率係20000:1 既話，即係隻牛要期指升20點佢先行$0.001，I.E. 理論上升20點就賺$10。
如果上面明白既話就再落下一部份。唔明既話睇多次。
以下有少少知識大家要知道先。
1.當一隻證佢既價位係介乎$0.010 至$ 0.250 之間既話，佢上落一個價位係以$0.001做上落單位。即係如果隻證係 $0.182 既話，佢升一個價位（或者叫升一格），就會變成 $0.183，再升一格就 $0.184。
2. 當一隻證佢既價位係介乎$0.250 至$ 0.500 之間既話，佢上落一個價位係以$0.005做上落單位。即係如果隻證係 $0.400 既話，佢升一個價位（或者叫升一格），就會變成 $0.405，而唔係 $0.401。$0.405 再升一格就 $0.410。
3. 當一隻證佢既價位係介乎$0.500 至$ 10 之間既話，佢上落一個價位係以$0.01做上落單位。即係如果隻證係 $0.700 既話，佢升一個價位（或者叫升一格），就會變成 $0.710，而唔係 $0.701。$0.710 再升一格就 $0.720。
越近回收價既牛熊證，佢既價格就越低。如果張證只值$0.02既話基本上都係死亡邊緣接近回收價。
近回收價既牛證（熊證）我地叫近牛（近熊），遠回收價既叫遠牛／遠熊。
明白左唔同價位既牛熊證上落幅度唔同既話就再睇下面。
上面換股比率講既例子，你可以見到全部既上落單位都係以$0.001 計，即係果Ｄ例子既證既價都係$0.010- $0.250呢個範圍內。
我地而家試下舉下其他範圍既證既例子。
１）隻牛證現價$0.4。屬於$0.250- $0.500之間，換股比率係10000:1，所以理論上期指升10點，隻牛證就升$0.001。(10點/10000比率=$0.001)
但由於佢一個上落價位係$0.005，所以期指升10點既話理論上隻證係唔會有反應，20點都冇，30點都冇，要期指升50點隻牛證先會升，一升就升$0.005，變成$0.4005。
２）隻牛證現價係$0.495。屬於$0.250- $0.500之間，換股比率係20000:1，佢一個上落價位係$0.005，期指要升幾多點隻牛證先會升一個價位呢? (睇下面之前你可以試下自己計下)
答案：20000比率* $0.005= 100點
當升左100點之後呢隻證就升一個價位變成$0.500，成為左下一個階段範圍既牛證（$0.500 至$ 10 ），佢要再升一個價位既話要又幾多點呢？
答案：新階段範圍既一個價位係$0.01，所以係20000*$0.01= 200 點。
（拆解牛熊證）
係上面既例子到你可以睇到，當隻牛熊證越遠回收價（即係越安全）既時候，佢既靈敏度就會越低。
本身１００點就升到一格，但當佢越黎越安全時（跳入新範圍時），即使期指升１５０點都好佢都可以無反應，佢要２００點先升一格。
所以好多人都投訴過點解個市升佢隻牛個價都唔識郁，升左１５０點佢覺得見頂想賣，但見個價唔升就唔想賣，覺得好唔公平。
到跌返落去果陣又好靈敏咁跟到足。呢樣係因為牛熊證就係越安全越難賺錢。（但唔代表越危險越易）
而期指就唔會有呢個問題，以細期為例，每上落１點，就賺蝕＄１０。即使個市升到３００００點都好，跌到１００００點又好，都係每１點＄１０。
單位係倍數。即係當相關資產升跌１％，隻牛熊證理論上就會以呢個倍數既％升跌。
槓桿比率既計法 = 相關資產價格／（牛熊證價格 x 換股比率）
我舉個例子，用返最上面一開始張圖隻牛證：
當時恆指大約係19000點，牛證價格$0.035，換股比率10000:1
比率＝19000 /( $0.035* 10000) ＝ 54.2倍，差不多就係圖中果個倍率。
如果恆指升１% （１９０點），呢隻証就會升５４．２％，$ 0.035* (1+54.2%) = $0.054 (取最接近小數位後3位數)
我地試下用返換股比率條式黎計下，睇下結果係咪一樣
換股比率10000，即係升１０點就升$0.001，升左１９０點即係升$0.019 。0.035+0.019= $0.054
結果係一樣既，所以你可以用呢兩個方法估計自己既牛熊證會變成咩價，唔使成日睇住人地開價黎諗自己隻野其實係咩價 。
而由算式中我地可以估到，當分母越大，計出黎既數值就會越細，意思即係當隻證價越高，倍數就會越少；換句話說，隻證越接近死亡回收位，倍數越大，越遠時倍數就會自然變低。
我地又試下計一計。
當19000點升到21000點，照用上面果隻證。當升到21000點時，呢張證既理論價就會升 （2000點／每10點升$0.001） = $0.2 。
當升2000點到21000點時就係 $0.035+$0.2= $0.235。
倍數= 21000/(0.235 *10000) = 8.9362 倍
（拆解牛熊證）
好多人易為牛熊證好簡單，但我諗大部份炒牛熊證既人跟本就唔識計如果個市升跌幾多自己隻證會值幾多錢。好多時跟本同理論價值差左好遠，比人抽緊水而自己都唔知，只係任人地開咩價而睇自己隻證值幾錢。
而期指就唔使上面呢Ｄ咁複雜既計算，而有好多人係貪牛熊證既高槓桿倍數去玩，好似上面５４倍，好吸引。只要期指升１％，隻證就會升５４％，輸既話最多只係本金。
但呢個諗法其實係好危險，最多只係輸本金既話即係輸幾多％？即係１００％。
你既投資額全部冇晒，咁樣一Ｄ都唔係低風險，而越高倍數就代表住越近回收價，輸晒１００％既機會係越高。
所以牛熊證近回收價係難玩易死，遠回收價又經常報唔足價比人呃秤咁。
而期指你就可以自由決定止蝕位，唔會比回收價限制住，遠近既賺蝕係一樣咁公道。
簡單黎講就係佢偏離左理論價值幾多，如果係正數既話即係貴過「恆指」理論上既價值（並非期指）
正常黎講係一定會有溢價，因為發行商出得呢Ｄ商品就係要抽下水賺錢。但有時都會出現負溢價，下面講。
溢價公式
牛證溢價（%）= [（牛證價格 x 換股比率）+ 行使價 – 相關資產價格]／相關資產價格
熊證溢價（%）= [（熊證價格 x 換股比率）– 行使價 + 相關資產價格]／相關資產價格
牛熊證價格上落會否對溢價有影響
我地可以試下計下。用之前部份既一個例子：
牛證；換股比率10000：1。19000點時，價值$0.035，21000點時，價值$0.235。行使價18700。
19000點時：(($0.035*10000) + 18700 - 19000) / 19000 *100% = 0.263%
21000點時：(($0.235*10000) + 18700 - 21000) / 21000 *100% = 0.238%
溢價百份比係隻牛證升值後係低左，但千其唔好比呢個數呃左，因為佢係百份比。
真正計溢左幾多價（實際點數），條式係咁
牛證溢價（實際點數）= [（牛證價格 x 換股比率）+ 行使價 – 相關資產價格]
熊證溢價（實際點數）= [（熊證價格 x 換股比率）– 行使價 + 相關資產價格]
19000點時：(($0.035*10000) + 18700 - 19000) = 50點
21000點時：(($0.235*10000) + 18700 - 21000) = 50點
換股比率10000:1；50點既話即係價值$0.001*5 = $0.005。
好多時會見到D負溢價既牛熊證，係咪代表住呢Ｄ抵買Ｄ呢？
我可以答你大部份都唔係。呢Ｄ負溢價只係一種暫時性既幻覺。
牛熊證真實計價係用「期指」而唔係「恆指」，但係計算溢價既時候，用既係「恆指」而唔係「期指」。
如果有睇開期指既朋友就會知道，在恆指成份股派息既月份既月頭時，期指通常會比恆指低。咁係由於Ｄ股票在月頭既時候未除淨，當Ｄ股票除淨左之後，股價會下跌，股價下跌既話就會影響恆生指數下跌。而期指既點數，不論月頭月尾都係反映左已經除淨左既價，所以期指唔會因為除淨呢個因素而下跌。
同樣，由於牛熊證係以期指計價，所以即使恆指因除淨下跌都好，都唔會影響牛熊既價格。即係話，因除淨而令恆指跌既時候，牛證唔會跌價，熊證都唔會升價。
有Ｄ人睇住恆指明明跌左幾十點但隻熊都唔升，呢個可能就係其中一個原因。
而當股票未除淨時，牛證既溢價係負值，好似抵買Ｄ，但當除淨後恆指下跌，絕大部份既溢價都會回歸做正值。而熊證既溢價係未除淨時，係會比平時睇落高Ｄ，但當除淨後恆指下跌，熊證既溢價會降低返Ｄ。
（拆解牛熊證）
睇完上面咁多既說明，我諗大家可能都會知道，指數牛熊證其實就係期指既衍生物品。如果用一個好簡單既比喻黎講牛熊證既話，我既比喻會係發行商在街市買一舊牛肉返黎，佢斬開左十份，將呢十份包好再加價，再賣廣告話比人聽有得買，然後就賣比散戶。而你其實係可以好簡單咁自己走去街市買呢舊牛肉，中間係唔使比人抽水。
牛熊證係一種槓桿式產品，而呢種槓桿效果佢地其實係當買既人同佢地借左錢去買相關既投資產品。點解可以一千幾百就買到一張類似期指效果既野？而唔使比果萬幾蚊按金？ 就係佢當你借左佢錢，收左你利息，再幫你買期指但斬開１０分１份賣比你。
就係因為當你借左佢錢，所以先有倍數效果。
而借佢錢既利息，佢就計係呢Ｄ財務費用到，即係溢價入面。
而借錢既利息，係隨住時間越長就收得越多，但係佢地無可能向買牛熊證既人日日都收利息，
所以佢地就會係發行既時候，直接將由發行開始，去到到期果日之間既利息一次過加晒入張證到。
即係話到期日越長既證佢既利息越高，佢既抽水力越強。
而如果你HOLD住一張證佢又一路唔死，而個指數唔升唔跌都好，隻證個價其實係會好慢好慢咁跌，因為發行商當係利息咁收走。
而如果你買左一隻岩岩出世既證，佢又極速比人斬左既話，即使佢年期有一年都好，一開始買既時候，因為發行商已經將一年既利息計左入去，就算你只係買左一日，佢都會全數沒收。
如果你買期指既話，就根本唔使比人抽水，唔使比利息人，又唔使計溢價抵唔抵咁煩。
P.S. 財務費用 =
（行使價／換股比率）x 財務利率（一年）x （剩餘年期（日數至到期日）／365）
（拆解牛熊證）
成日都會聽到Ｄ人講個莊唔開價，一開價就闊過西隧。
如果個市場冇人有呢隻證，基本上就只係你同個發行商對賭。
咁佢開既買價賣價自然就唔貼。一買完之後想賣返都已經差左幾個價位。
如果街貨量多Ｄ既話有可能會容易Ｄ同其他散戶交易。
但基本上街貨量呢樣野對於交易影響唔太大。
牛熊證另一個比人討論得多既地方就係有牛熊證街貨分佈圖呢樣野。
好現實咁講，大部份既散戶都係輸錢既人，而買得牛熊證既基本上都係唔識野既人多，所以呢班人輸錢係好普遍。
而市場上有好多陰謀論既說法就係話Ｄ大戶或者發行商，佢地為左要殺左Ｄ牛熊，強制回收（目的係可以立即收走全部利息之類），而控制個大市上落。
例如可能只係差１００點隻牛就死既，發行商就專登做低個市，等隻證死左之後就回復返。呢Ｄ說法係真係假大家自行判斷。
牛熊證比起期指其實都有少少好處，都唔係咩都衰晒
１）牛熊證唔使按金，簡單睇既話真係只要一千幾百就入得場，抵唔抵玩係另一回事
２）唔使諗補倉，比人斬左就好似賭場玩完一鋪大細咁，即走
３）有Ｄ專業既人可能會用牛熊證黎做套戥，呢種做法的確係有錢可賺（基本上散戶好難做）
講左咁耐，我做一個小小既總結：
１）牛熊證有回收價，剩餘價值用最低價既計法擺明抽水。
２）因為換股比率既問題，市升市跌佢唔能夠完全反映係價格上
３）價格越高，靈敏度越低
４）越近回收價，靈敏度雖高，槓桿高，但越易死，不能平均計算風險回報。
５）溢價計算麻煩，財務費用，利息高擺明又係抽水。
６）差價大，一買一賣可以差幾個價位，又係蝕水。
７）可能會被做市殺死隻牛熊
期指上落簡單易計，細期每點$10，大期每點$50；無牛熊證既不公平現象；無人抽水；多人買賣所以差價極低；無溢價；期指仲有夜期，有咩唔對路夜晚可以走人。
香港市場點解咁多人買牛熊而唔買賣期指呢？
好大原因係因為發行商經常係唔同地方賣廣告，佢地做得廣告即係有錢收，羊毛出自羊身上。
點解Ｄ散戶佢地唔識期指呢？因為期指中間無既得利益者，無人賣廣告，無人出教學（但我出左），所以相對黎講就好少人識。
我聲明一下先，我出呢篇文係話比大家聽牛熊證相比起期指有咩缺點，不過，都唔等於我鼓勵大家炒賣期指，炒賣期指都係有相當既風險，大家要小心留意。
唔入股市係無問題，好多人炒完係仲衰過唔炒，但如果想成為一個優秀既投資者/投機者既話，其中一步就係要清楚自己有咩武器，我希望我出完呢篇教學之後大家可以更加了解工具既特質，令你既投資／投機之路做得更好。